Cyraeddiadau
Yn ystod ei oes gymharol fyr, mae'r Ymddiriedolaeth
wedi gallu cefnogi amrywiaeth eang o elusennau ac
achosion da, o rai sy'n caniatáu i unigolion gyrraedd
targedau personol, i brosiectau sy'n ymglymu
cannoedd.
Mae myfyrwyr o'n hardal wledig wedi cael cymorth i
ymgymryd â phrosiectau heriol mewn llefydd o
Antartica i Tanzania. Mae oedolion wedi cael cymorth i
wynebu sialensiau personol o rwyfo'r Iwerydd i her
ddyddiol byw gydag anabledd.
Trwy sefydlu ysgoloriaeth gyda Choleg yr Iwerydd,
bydd yr ymddiriedolaeth yn rhoi cymorth i bobl ifanc
o'n hardal i fynychu'r coleg arloesol rhyngwladol hwn
yng Nghymru, sy'n anelu i ddarparu addysg o'r radd
flaenaf a hybu dealltwriaeth ryngwladol.
Mae'r Ymddiriedolaeth yn falch iawn hefyd o sefydlu
Clwb Dydd Sadwrn yn yr ardal i bobl ifanc sy'n dymuno
cymryd rhan mewn gweithgaredd menter yr ifanc neu
ddysgu sgiliau ymarferol, fel mecaneg ceir a weldio.
Trwy gefnogi ymweliadau gan Ensemble Cymru i
ysgolion cynradd ac uwchradd, mae'r disgyblion wedi
cael cyfle i weld perfformiadau byw o gerddoriaeth
glasurol gan gymryd rhan mewn dosbarthiadau meistr
gyda cherddorion cyngerdd.
A thrwy gefnogi Film 15, mae pobl ifanc wedi cael y
cyfle i weithio ochr yn ochr gyda gwneuthurwyr ffilm
proffesiynol, gan weld prosesau ysgrifennu sgriptiau,
actio, camera, sain, goleuo, golygu a phob agwedd o
gynhyrchu ffilm ar waith. Mae'r gweithdy'n ysbrydoli
pobl ifanc i wneud eu ffilmiau eu hunain, datblygu eu
syniadau a'u hannog i ymestyn tu hwnt i'r hyn a
feddylient oedd yn bosibl.
Mae'r Ymddiriedolaeth yn arbennig o falch o fod wedi
gallu cefnogi mentrau na fyddai, heb ysgoloriaeth gan
yr Ymddiriedolaeth, wedi gallu digwydd.
